16.09.2016 Ҡаҙаҡтарҙы көлдөрҙөк

Башҡорт асыҡ КВН лигаһының йыйылма командаһы егеттәре Астана акимы (мэры) кубогында ҡатнашып ҡайтты. Буш ҡайтманы беҙҙекеләр – махсус призға эйә булдылар.
Хәтерегеҙҙәме икән, августа Ҡаҙағстандың ҠаҙИИТУ командаһы Өфөлә үткән “Йәйге ку­бок”та гран-при яулағайны. Үҙ сиратыбыҙҙа, беҙҙең иң шәп шаяндар Астанаға юлланды. Эйе, эйе, һеҙ дөрөҫ аңланығыҙ, хәҙер башҡорт КВН-ы сит илдәр менән дә бәйләнештә.
Башҡорт асыҡ КВН лигаһы рәйесе Урал Кәримов әйтеүенсә, Астана акимы кубогына ярыш Ҡаҙағстандың баш ҡалаһындағы популяр урында – 1700 тамашасыға иҫәпләнгән концерт майҙанында үткән. Ҡаҙаҡ телендә, әлбиттә. Ә беҙҙең команда мәрәкәләренең 70 процентын ҡаҙаҡса һөйләгән. Тел яҡын, өн әйтелештәре бер үк тиерлек, афарин, егеттәр, аптырап ҡалмағандар. Башҡорт теленә күскәс тә, тамашасылар улар­ҙы ихлас алҡышлаған.
Башҡортостан делегацияһы урындағы мәҙәниәт, көнкүреш ме­нән дә танышҡан, рәхәтләнеп ҡаҙаҡ йыр-бейеүҙәрен тамаша ҡылып, матур ҡаршылауҙары өсөн Ҡа­ҙағстан КВН берлегенә рәхмәт әйтеп ҡайтҡан.
– Республиканың Йәштәр сәйәсәте һәм спорт министрлығына фестивалдә ҡатнашыу мөмкинлеге биргәне өсөн ҙур рәхмәтебеҙҙе еткерәбеҙ, – тине Урал Кәримов.
Яҡташтарыбыҙ айырыуса йәш ҡаҙаҡтарҙың беҙҙең турала белеүенә ҡыуанған. Киләсәктә ике яҡ та КВН юҫығында бәйләнешен үҫтерәсәк. Ҡаҙаҡтар шулай йыл һайын ҡунаҡ саҡыра икән – былтыр ҡырғыҙҙар ҡатнашҡан. Быйыл 15 команда көс һынашҡан.
Әйткәндәй, быйыл Башҡорт асыҡ КВН лигаһы бишенсе миҙгелен ҡаршылай, уйындарҙа ҡатнашыу өсөн ғаризалар ҡабул ителә башланы ла инде. Юбилей миҙгеле мотлаҡ һеҙҙең иҫтә ҡаласаҡ, тип вәғәҙәләй шаяндар.

Алһыу ИШЕМҒОЛОВА.