27.03.2017 РАУИЛ БИКБАЙ Фекерҙәр һәм афоризмдар (27.03.2017)

Алға бармаған артта ла ҡалмаҫ,
Аҫылдарҙы Тәңре янына йыя,
Алтындарҙы ергә йәшергәндәй.
(“Һуңлап яҙылған шиғыр”).

* * *
Атайҙары ҡарап тора алһын,
Малайҙары атҡа менгәндә.
(“Атайҙар һәм улдар”).

* * *
Атаҡайың-әсәкәйең янына
саҡырғанда
Әсәкәйеңдең янына кил, кил һин иң
алда.
(“Хәҙистәр”).

* * *
Атланһаң да арыҡ атҡа,
Уйың менән фәҡир булма.
Елдерһәң дә арғымаҡта,
Яманатлы зат – ир булма.
Шағирҙарҙың батшаһы бул,
Батшалар шағиры булма.
(“Атланһаң да арыҡ атҡа...”).

* * *
Аттарымды алмаштырған булыр,
Антымды мин алмаштырмамын.
(“Аттарымды
алмаштырғанда ла...”).

* * *
Атылыр йондоҙҙо атылдырмай булмай,
Атылыр кешене аттырмай була.
(“Һыуһаным – һыуҙар бирегеҙ!”).

* * *
Ауыл алйотһоҙ булмаҫ!
(“Көндәлектәр”. 19.04.2011).

* * *
Ауыр саҡта дуҫын ташлап ҡасҡан
Ҡабат ҡасмаҫ тимә һис ҡасан.
(“Сыныҡтырҙы...”).

* * *
Ауырлыҡтар баҫһа, аумаҫ өсөн,
Ҡалмаҫ өсөн ебеп, еңелеп,
Үҙ-үҙеңә ышанысты юйма,
Үҙ-үҙеңә таян иң элек.
(“– Бөйөк китаптарҙы ғына уҡы...”).

* * *
Ауырлыҡты еңеләйткең килһә,
Тик ауырҙы күтәр.
(“Ваҡыт”).

* * *
Аш-һыуҙарын итһә бәрәкәтле,
Шул ҡатын-ҡыҙ булыр иң хөрмәтле.
(“Йөҙ ҙә бер хәҙис”).

* * *
Аяғындағы башмағы
Ҡыйбатыраҡ буш башынан.

* * *
Аяҡ – атлар өсөн,
Аҡыл – аңлар өсөн.
Күҙ – юлдан яҙмаҫ өсөн,
Әҙәп – әҙәм аҙмаҫ өсөн.
Ҡул – яҡшылыҡ ҡылыр өсөн,
Күңел – сафлыҡҡа тулыр өсөн...
(“Көндәлектәр”. 8.05.2014).

* * *
Аяҡ ергә тейгәс, тойҙом:
Бит буйлап аға тирем,
Һинһеҙ бигерәк ҡыйын икән,
Ерем! Ерем!
(“Ағиҙел аша сыҡҡанда”).

Рубриканы Факил МЫРҘАҠАЕВ