02.08.2013 Яҙыусыларҙы бәйгегә саҡырабыҙ

Билдәле булыуынса, 2012 йылда Башҡортостан Яҙыусылар союзы идараһы ҡарары менән Башҡортостандың халыҡ сәсәне Мөхәмәтша Буранғолов исемендәге әҙәби премия булдырыл­ғайны. Былтыр был премияның тәүге лауреаты булып яҙыусы һәм тарихсы Йыһат Солтанов («Сөләймән Мырҙабулатов. Тормошо һәм көрәше» китабы өсөн) танылды.
Быйыл да 1 августан 31 октябргә тиклем Рәсәй һәм Башҡортостан Яҙыусылары союзы ағзалары булған яҙыусыларҙың, шағирҙарҙың, шулай уҡ әҙәбиәтсе һәм фольклорсыларҙың Башҡортостан халыҡтары тормошон сағылдырыуға, башҡорт әҙәбиәте, тәнҡите һәм фольклористикаһындағы мөһим проблемаларға арнал­ған, йәмғиәттә киң танылыу яулаған юғары художестволы әҫәрҙәр ҡабул ителә. Премияға тәҡдим ителгән әҫәрҙәр һәм эштәр күрһәтелгән көнгә тиклем кәмендә бер йыл эсендә матбуғатта баҫылып сыҡҡан булырға тейеш.
Уларҙы комиссияға яҙыусылар ойошмалары, уҡыу йорттары, йәмәғәт берекмәләре, гәзит һәм журнал редакциялары, нәшриәттәр тәҡдим итә ала. Дәғүәселәрҙең йәше сикләнмәй.
Мөхәмәтша Буранғолов исемендәге әҙәби премияға документтар Башҡортостан Яҙыусылар союзына тапшырыла. Адресы: 450076, Өфө ҡалаһы, Коммунистик урам, 34. Тел./ факс: (347) 273-30-47.

Башҡортостан Яҙыусылар союзы идараһы.