18.10.2013 Мәҙәниәт яңылыҡтары
Ырымбурҙа – башҡорт мәҙәниәте байрамы
Ырымбур өлкәһендә башҡорт мәҙәниәте байрамы саралары дауам итә. Ойоштороусылары – өлкәнең Мәҙәниәт министрлығы, Халыҡ ижады методик үҙәге, БР Мәҙәниәт министрлығы, Республика халыҡ ижады үҙәге.
“Түңәрәк өҫтәл”дәр, оҫталыҡ дәрестәренән торған семинар халыҡ сәсәне Мөхәмәтша Буранғоловтың тыуыуына 125 йыл тулыуға арналған. Ә йәштәр өсөн 19 октябрҙә Красногвардейск районының мәҙәниәт йортонда уҙасаҡ “Йәшлек-шоу”ҙа Гөлсөм Бикбулатова, Рәдиф Зарипов, Иҙел Аралбаев, Юнир Һағынбаев кеүек Башҡортостан артистары ла сығыш яһаясаҡ.
Назар Нәжми тураһында китап
Башҡортостандың халыҡ шағиры Назар Нәжмиҙең тыуыуына 95 йыл тулыуға арнап, «Китап» нәшриәтендә «Назар Нәжми. Тормошо һәм ижады» тигән китап-фотоальбом донъя күрҙе. Төҙөүселәр — Салауат Юлаев исемендәге дәүләт премияһы лауреаттары Ирек Кинйәбулатов менән Ҡәҙим Аралбай.
Ярайһы уҡ ҡатмарлы тормош юлы үткән һәм үҙ халҡына ҡабатланмаҫлыҡ рухи мираҫ ҡалдырған философ, драматург тураһындағы китапта замандаштарының, туғандарының иҫтәлектәре, журналистарҙың мәҡәләләре, библиографик мәғлүмәттәр, шағирҙың әҫәрҙәренән өҙөктәр килтерелә.
– Был уникаль китап-альбом туған телен, мәҙәниәтен һәм илһамлы шиғриәтте яратҡан һәм уның баһаһын белгән бер кемде лә битараф ҡалдырмаясаҡ, – ти И. Кинйәбулатов.
«Рудольф Нуриев. Тынғыһыҙ иблис»
Бөйөк яҡташыбыҙ Рудольф Нуриев хаҡындағы фильм прокатҡа сыҡты. Ул тик илебеҙҙең өс ҡалаһында – Мәскәү, Санкт-Петербург һәм Өфөлә генә күрһәтеләсәк.
Бөгөн йәш быуын данлыҡлы яҡташыбыҙ хаҡында белеп бөтмәй. Әммә уның 1961 йылда «иреклеккә табан һикереүен», йәғни Парижда үткән гастролдән һуң Советтар Союзына ҡайтыуҙан баш тартыуын бер ни тиклем ишетеп беләләр. Шуны ла әйтергә кәрәк, картинала был фактҡа баҫым яһарға тырышмайҙар, ә төп иғтибар уның шәхесенә, тормош төпкөлөнән донъя кимәленә күтәрелеүе хаҡында. Ысынлап та, бөйөк Кеше, ҡыҙыҡлы, ә бәлки, аяуһыҙ яҙмыш...
Фильмды 18, 23, 25 октябрҙә «Искра» кинотеатрында ҡарарға була. Киске сәғәт 7-лә башлана.