08.01.2013 Ижадтары лайыҡлы баһаланды

Башҡортостан Президенты Рөс­тәм Хәмитов бер төркөм мәҙәниәт хеҙмәткәренә республиканың почетлы исемдәрен биреү тураһындағы указға ҡул ҡуйҙы.
Һуңғы йылдарҙа Баш­ҡортостанда ғына түгел, күрше төбәктәр­ҙә лә танылыу яулаған йырсы Ғәзим Ильясов­ҡа (Күгәрсен районында йәшәй) һәм композитор, профессор, З. Ис­мәғилев исемендәге Өфө дәүләт сәнғәт академияһының композиция кафедраһы мөдире Ләйлә Исмәғилеваға «Башҡортостан Респуб­ликаһының халыҡ артисы» исеме бирелде.
«Башҡортостан Республикаһының атҡаҙанған артисы» исеменә Х. Әх­мәтов исемендәге Башҡорт дәүләт филармонияһы солисы Лилиә Биктимерова, М. Кәрим исемендәге Милли йәштәр театры актеры Гөлшат Ғайсина, Нефтекама дәүләт филармонияһының аккомпаниатор-концертмейстеры Марс Ишморатов, Мари Иле Республикаһының М. Шке­тан исемендәге мари милли драма театры филиалы – Мари йәш тамашасы театрының «Станислав» студияһы етәксеһе Ста­нислав Шакиров ла­йыҡ булды.
М. Ғафури исемендәге Башҡорт дәүләт академия драма театрының ҡуйыусы ре­жиссеры Айрат Әбү­шаһманов һәм З. Ис­мәғилев исемендәге Өфө дәүләт сәнғәт академияһының ка­федра мөдире, профессор Рөстәм Шәй­хетдинов «Башҡортостан Респуб­ликаһының атҡаҙанған сәнғәт эшмәкәре» исемен йөрөтәсәк.
М. Аҡмулла исемендәге Башҡорт дәүләт педагогия университетының художество-графика факультеты деканы Тәлғәт Мөсәлимовҡа «Башҡортостандың атҡаҙанған рәссамы» исеме бирелде.
Бынан тыш, тағы ла бер төркөм кеше «Башҡортостан Республи­каһының атҡаҙанған мәҙәниәт хеҙмәткәре» исемен алды. Улар: Өфө сәнғәт училищеһы уҡытыусыһы Ана­толий Богомолов, Стәр­летамаҡ дәүләт рус драма театры директоры Виктория Замесина, Силәбе өлкәһе Златоуст ҡа­лаһының «Һандуғас» халыҡ ансамбле етәксеһе Фәнит ҡа­расурин, Өфөләге «Нефтсе» мәҙәниәт һарайының өлкән администраторы Татьяна Саф­ронова, Әбйәлил район мәҙәниәт йорто режиссеры Радмир Сол­танбаев, Ишембай ҡала мәҙәниәт һарайында эшләп килгән «Ря­бинушка» халыҡ вокаль ансамбле етәксеһе Татьяна Яровая.