RSS-подписка Вконтакте Вконтакте
» » Тыуған ауылына рәхмәтле йырсы

04.08.2018 Тыуған ауылына рәхмәтле йырсы

Тыуған ауылына рәхмәтле йырсы
Ғүмерҙе моңло йырға тиңләһәләр, ә уның концерттарында булыу – үҙе бер ғүмер. Йәйҙең иң йәмле кисендә, 28 июлдә, Ришат Төхвәтуллиндың бына инде туғыҙынсы мәртәбә матур изге йолаға әйләнгән хәйриә концерты барыһын да хайран ҡалдырып, талантына һоҡландырып, юғары кимәлдә үтте. Ҡарамалы-Ғөбәйгә кескенәһенән башлап олоһона тиклем яҡынса ун меңдән ашыу халыҡ йыйылды.

Ундағы һәр бер үлән-ағас, ағас­тағы япраҡ та, күҙҙең яуын алырлыҡ хуш еҫле сәскәләр ҙә, мәтрүшкәләр ҙә, ҡоштар ҙа, хатта янда ғына ағып ятҡан саф һыулы Өсән йылғаһындағы балыҡтар ҙа Ришатҡа ҡушылып йырлап-бейене төҫлө! Талантлы, тырыш, моңло йырсының ижадташ дуҫтары – Гүзәл Уразова, Илдар Хә­кимов, Рифат Шәрәфетдинов, киләсәге өмөтлө, ижадта яңы идеялар менән янып йөрөүсе Илнур Рамазанов (продюсеры Риф Арыҫлан да килгәйне), Резеда Бүләкова, Октябрьский музыка колледжының йәш таланттары ла сығыш яһаны. Ришаттың Октябрьский колледжында уҡы­ған саҡта белем биргән остаздары уның, моңло һәм маһир йырсы булыуынан тыш, шәп ойоштороу­сы, бер ниндәй ҙә ҡара эштән ҡурҡып тормаусы шәхес булыуына һоҡланыуын белдерҙе.
Тамашасыларҙы иң беренсе сәхнә биҙәлеше хайран ҡал­дырҙы. Шулай булмай ни?! Бын­дай сәхнәне ҡайһы саҡ баш ҡала урамдарында ла күрмәҫһең. Ундағы ҙур, мөһабәт экран, заманса, яуым-төшөмгә сыҙамлы материалдан эшләнгән япмалар, тупһалар, сәхнәлә тик затлы йырсылар ғына сығыш яһаһын өсөн ҡулайлаштырылған музыкаль аппаратура, күҙҙе ҡамаштырырлыҡ, йәйғор нурҙарындай төрлө төҫтәге уттар, байрамса биҙәлгән тирмә, телеңде йоторлоҡ итеп яланда бешерелгән тәмле аш еҫе, ихлас тамашасыларҙың ай яҡтыһында балҡыған йөҙҙәре... Уйлап ҡараһаң, бының өсөн күпме көс, физик һәм рухи ныҡлыҡ, матди сығым талап ителгәнлеген Ришат һәм уның яҡын дуҫтары, яҡындары, командаһы, концерттарҙың директоры, ауылдаштары ғына беләлер. Бынан тыш, әллә күпме ойоштороу эшен дә башҡар­ған улар: артистарҙы ашатыу, ял иттереү, ситтән килгән сығыш яһаусыларға ҡунырға урын хәстәрләү, «Роспотребнадзор», һаҡ, медицина ярҙамы күрһәтеү хеҙмәткәрҙәрен йәлеп итеү (улар бындай сарала мотлаҡ булырға тейеш, ҡанун шулай талап итә). Иң мөһиме, – тамашасылар өсөн оҙон-оҙон эскәмйәләр, Италия­лағы асыҡ һауалағы боронғо концерт за­лын хәтерләтеп, тау битләүенә ҡунған турғай балалары ке­үек теҙелешеп һу­ҙылып киткәйне. Асыҡ һауалағы «Ҡа­рамалы-Ғөбәй амфитеатры»н барлыҡҡа килтереү өсөн әллә күпме физик һәм матди сығым талап ителгән! Ҡыҫҡаһы, һанап бөткөһөҙ мәшәҡәт. Ә күңелдә шундай рәхәтлек, сөнки һин бит изге эш эшләйһең, был бит хәйриә концерты, һәр бер өнөңә, моңоңа тиклем – һәммәһе лә Аллаһы Тәғәлә ризалығы өсөн башҡарыла. Шуларҙы иҫкә төшөр­һәң, бөтә арыу онотола! Ҡайҙан ғына килмәгән Ришаттың ижадын һөйөүселәр – Мәскәү, Ҡазан, Яр Саллы, Өфө, Пермь, Екатеринбург ҡалаларынан, Ырымбур өлкәһенән... Хатта Ырымбурҙағы дуҫтары был төбәккә генә хас булған эксклюзив ашамлыҡ килтергән! Кон­цертта ҡурай, баян моңдары ла яңғыраны, гитара ҡылдары ла күңелдәр­ҙе тирбәлтте, саксофон тауышына ҡарағайҙар бейене, ҡайын шауланы, иҫ китмәле камил бер моңло тәбиғәт картинаһы хасил булды! Хатта Ришаттың ауылына дан йырын әрмән телендә лә башҡарҙылар. Әлбиттә, йырсының концерты уның һөйкөмлө әсәһенең йырлауынан тыш үтеүе мөмкин түгел. Хөрмәтле Розалия Нурулла ҡыҙы ла ҙур тулҡынланыу һәм ихласлыҡ менән тәрән мәғәнәле өр-яңы йыр башҡарҙы. Егәрле Ришат иһә, ғәҙәттәгесә, үҙенең өр-яңы йырҙары менән дә һөйөндөрҙө, беҙ яратып ҡабат-ҡабат тыңлағандарын да башҡар­ҙы. Хатта музыкаль оҙатыуһыҙ «Ағым һыу» менән «Турғай»ҙы тамашасылар һорауы буйынса иҫ киткес хисле һәм яғымлы итеп йырланы. Матур салют аҫтында Ришаттың йырҙарын тыңлаусы һәр бер тамашасы ошо биш сәғәттә иң яҡты, матур һәм изге хис-тойғолар кисергәндер. һауала осоп йөрөүсе тимер ҡанатлы сюрприз да концертҡа биҙәк өҫтәне.
Концерттан килгән аҡса ауылдың балалар баҡсаһына, мәсеткә йүнәлтелһә, бер өлөшө мохтаж балаға медицина ярҙамы күрһәтеүгә бирелде. Концертҡа фатиха биреп асып ебәреүсе ауыл имамы Хәлит Ришат Айрат улының даими рәүештә башҡарған изге эше өсөн ҙур рәхмәт һүҙҙәрен еткер­ҙе. Ярайһы ғына ҙур булған Ҡарамалы-Ғөбәй ауылы урамындағы асфальт тап Ришаттың хәйриә ярҙамы менән төҙөкләндерелде һәм сүп-сарҙан таҙартылды. Уны төҙөкләндереүҙә ярҙам иткән барлыҡ эшселәргә, ауылдаштарына – Марсель Хә­кимов, Нәркиз Шәрәфиев, Айнур Зиязетдинов һәм Ренат Төх­вәтуллинға, өсөнсө төҙөлөш идаралығы етәксеһе Илфир Миң­лебаевҡа рәхмәт һүҙҙәрен бөтә ауылдаштары исеменән Ришат үҙе ҙур ғорурлыҡ менән еткерҙе. Бөтә яҡтан да уйлап эш итеүсе йырсы бер кемде лә иғтибарһыҙ ҡалдырманы, ихлас күңелдән шатланып, балаларса эскерһеҙлек менән балалар баҡсаһын төҙөкләндереүгә ярҙам иткән дуҫтары Илһам Шәриповҡа, Ильяс һәм Илсаф Ғима­дутиновтарға ла барлыҡ ауыл халҡы исеменән рәхмәт юлланы. Киләсәктә лә шулай дәррәү һәм берҙәм, татыу булып, ярҙам ҡулы һуҙышып йәшәйәсәктәренә ба­ҫым яһап, ул тыуған Башҡортос­танының сәскә атыуы, бөхтәлеге, матурлығы өсөн һәр кем үҙ өлөшөн индерә алыуын үҙенең ауылы миҫалында иҫбат итте һәм был изге эштең артабан да дауам иттереләсәгенә вәғәҙә бирҙе! Был изге йола шулай киләсәктә лә дауам итһен, Ришаттың ижад ҡанаттары талмаһын, һәр саҡ үҙенең ижадын яратыусыларҙың рухи һыуһынын ҡандырып торһон!

Наҡыя ИСҠУЖИНА,
филология фәндәре кандидаты.
Өфө ҡалаһы.










Оҡшаш яңылыҡтар



«Бер ваҡытта ла бер кемгә лә оҡшарға тырышманым»

«Төрлө сағым була минең дә...»

05.10.2019 - Мәҙәниәт һәм сәнғәт «Төрлө сағым була минең дә...»


Шағирә, продюсер Светлана ШӘРИПОВА: “Тормош дауам итә!”

«Ғәфү ит мине,  әсәй!»

21.09.2019 - Мәҙәниәт һәм сәнғәт «Ғәфү ит мине, әсәй!»


«Тамашасы  ихласлыҡты күрә белә»

19.09.2019 - Мәҙәниәт һәм сәнғәт «Тамашасы ихласлыҡты күрә белә»


Вайнер ҙа – туған тел һаҡсыһы!

05.09.2019 - Мәҙәниәт һәм сәнғәт Вайнер ҙа – туған тел һаҡсыһы!


Күктә балҡый уның йондоҙсоҡтары...

25.08.2019 - Мәҙәниәт һәм сәнғәт Күктә балҡый уның йондоҙсоҡтары...


Туйҙарҙа яралған мөхәббәт

24.08.2019 - Мәҙәниәт һәм сәнғәт Туйҙарҙа яралған мөхәббәт


“Ябай кеше булараҡ уңыш яулап ҡара...”

17.08.2019 - Мәҙәниәт һәм сәнғәт “Ябай кеше булараҡ уңыш яулап ҡара...”


Рәсәйҙең атҡаҙанған мәҙәниәт хеҙмәткәре Рәйес ИСМӘҒИЛЕВ: “Һуғыш суҡмары булдым”

Ни өсөн Эльмира Юлдашеваны “Лунатик” тигәндәр?

“Драматургия – әҙәбиәттең иң ҡатмарлы жанры”

«Урал батыр»ҙы яттан һөйләнеләр

20.06.2019 - Мәҙәниәт һәм сәнғәт «Урал батыр»ҙы яттан һөйләнеләр


«Мәҙәниәт  хеҙмәткәрҙәре өсөн  ял юҡ»

15.06.2019 - Мәҙәниәт һәм сәнғәт «Мәҙәниәт хеҙмәткәрҙәре өсөн ял юҡ»


"Тормошҡа ашмаҫ хыялдар ҡормайым"

27.05.2019 - Мәҙәниәт һәм сәнғәт "Тормошҡа ашмаҫ хыялдар ҡормайым"


Йырсы менән бейеүсе –  шул тиклем пар килгәнсе

«Талантың булмаһа, шоу яһау ярҙам итмәй»

16.05.2019 - Мәҙәниәт һәм сәнғәт «Талантың булмаһа, шоу яһау ярҙам итмәй»


Көтөүсе булырға теләмәһәң, бейеүсе булырға мөмкин

Башҡортостандың атҡаҙанған артисы Лилиә РӘСҮЛЕВА: «Күңелем  романтикаға тартыла»

“Тормошомда осраған  һәр кешегә рәхмәтлемен”

Театр ишеген асҡас...

30.03.2019 - Мәҙәниәт һәм сәнғәт Театр ишеген асҡас...


Аҡыл менән хистәр береккәндә

25.03.2019 - Мәҙәниәт һәм сәнғәт Аҡыл менән хистәр береккәндә


Йәштәр театры һөйөндөрә

23.03.2019 - Мәҙәниәт һәм сәнғәт Йәштәр театры һөйөндөрә


«Бирешмә!» беренсе үҫмерҙәр премияһы

15.03.2019 - Мәҙәниәт һәм сәнғәт «Бирешмә!» беренсе үҫмерҙәр премияһы