13.11.2010 Теләгәнеңде тәҡдим итә «Метелица»
ҡырмыҫҡалыларға ғына түгел, күрше райондарҙа йәшәүселәргә лә билдәле сауҙа йорто ул «Метелица». Тауарҙарҙың бай ассортименты, хаҡтарҙың ауыл халҡының финанс мөмкинлегенә йүнәлтелгән булыуы менән танылыу яулаған ул. Иң мөһиме, һатып алыусылар көнкүреш һәм хужалыҡ эшмәкәрлеге өсөн кәрәкле әйберҙәрҙе бер үк кибеттә таба ала. Сауҙа залында көнкүреш техникаһының, заманса йыһаздарҙың бөтә нескәлектәренә төшөндөрөүсе асыҡ йөҙлө хеҙмәткәрҙәр ҡаршы ала. Нәҡ ошо үҙенсәлектәр «Метелица»ны сауҙа өлкәһендәге төрҙәштәренән – юғарыраҡ, ә һатып алыусыларға яҡыныраҡ итә. Әйтәйек, инструменттар бүлегендә ауыл халҡына үҙ хужалығында ҡулланылышлы эш ҡоралдары, газ һәм йылытыу йыһаздары, ғөмүмән, йорт өсөн кәрәкле бөтә әйбер бар. Ә инде хужабикәләрҙе һыуытҡыс, электр сәйнүктәре, микротулҡынлы мейестәр, һауыт-һаба, ит турағыс, саң һурғыс, келәм һ. б. тауарҙар ҡыҙыҡһындыра. Йәштәрҙе кеҫә телефоны, элемтә тауарҙары витринаһы йәлеп итә. Кибеттә тауарҙарҙың йәнең теләгәнен һайлап алырға мөмкин.
Үҙенән-үҙе ошо тауар муллығын булдырған кибеттең хужаһы менән танышыу теләге тыуа. Районда күптәргә таныш булдыҡлы эшҡыуар Рита Фәрит ҡыҙы Булатова ул. Йәмәғәте 
Азат Зөфәр улы – уның төп ярҙамсыһы, таянысы.
ҡырмыҫҡалы – Булатовтарҙың тыуған ере. Фәрит менән Рита студент йылдарында уҡ матур итеп ғаилә ҡорған. Белгес дипломы алғас, улар Салауат ҡалаһында эшкә урынлаша. Әммә йәшлек романтикаһы уларҙы Себер яҡтарына әйҙәй. Унда байтаҡ йылдар эшләгәс, йәғни үҙгәртеп ҡороу осоро башланғас, тыуған яҡтарына ҡайталар һәм үҙҙәрен сауҙа өлкәһендә һынап ҡарарға ниәтләйҙәр.
Ул осорҙа халыҡта келәмдәр ҙур һорау менән файҙалана. Тәүҙә баҙарҙа палатҡа ҡороп, шулай уҡ ауылдарға ла йөрөп, сауҙа итәләр. Бер аҙ аҡса һәм тәжрибә туплағас, ҡырмыҫҡалы ауылында тәүҙә – бер, унан икенсе кескенә кибеттәр һатып алыу хәстәрлеген күрәләр. Һуңғыһын һүтеп, урынына әлеге заманса «Метелица» кибетен төҙөтәләр ҙә инде. Сауҙа селтәрен киңәйтеү маҡсатында күрше Архангел ауылында ла кибет асҡандар. «Әлегә ҡәҙәр тапҡан бар аҡсаны сауҙа үҫешенә йүнәлттек», – ти Булатовтар.
Тауарҙарҙы, нигеҙҙә, республиканың күмәртәләп һатыу базаларынан, Белоруссиянан, Калининград өлкәһенән һәм илдең башҡа ҡалаларынан ҡайтарталар. Уларҙың сифаты гарантиялана. Халыҡ үҙенә кәрәкле тауарҙарға алдан заказдар ҙа бирә. Даими һатып алыусыларға дисконт картаһы буйынса ташламалар ғәмәлгә индерелгән. Кибет тәүлек әйләнәһенә эшләй. Халыҡты ун ике һатыусы-белгес хеҙмәтләндерә.
«Метелица» кибете райондың сауҙа хеҙмәтләндереүе өлкәһендә бар яҡлап та өлгөлө булып тора. Шуға халыҡтан бары тик рәхмәт һүҙҙәре генә ишетәләр.
Земфира ХӘКИМОВА.
ҡырмыҫҡалы районы.
Рәсимә ҒӘЛИЕВА фотолары.