16.04.2013 “Кәкре камера – 2”лә шәп әкиәт һөйләйҙәр
Февраль аҙағында иғлан ителгәйне башҡорт телендәге көлдөргөс видеояҙмалар конкурсы. Шәп кенә маҡсаттар ҙа ҡуйылды унда – башҡорт юморын үҫтереү, башҡорт юморын донъяға күрһәтеү һәм, әлбиттә, кәйефте күтәреү.
Ойоштороусылар алдан вәғәҙәләүенсә, “Бәйләнештә” селтәрендә барған “Кәкре камера – 2” видеоконкурсы 1 апрелдә тамамланды. Был юлы унда 31 яҙма ҡатнашты. Кемдәр социаль селтәрҙә әүҙем “ултыра”, улар видеояҙмалар менән мотлаҡ таныштыр.
Айырыуса “Әкиәтсе” яҙмаһындағы бәләкәй малай барыбыҙҙы ла үҙенең килештереп әкиәт һөйләүе менән әсир итте лә ҡуйҙы. Һәм, һөҙөмтәләр ҙә тап ошо видеояҙма файҙаһына ‒ әкиәт һөйләтеүсе Азалия Сәғитова беренсе урын яуланы. Учалы ҡыҙы үҙе Мәскәүҙә йәшәй һәм юғары уҡыу йортонда белем ала икән. Конкурс шарттары буйынса “Йәшлек”тә еңеүсе хаҡында мәҡәлә баҫылырға тейеш. Әлбиттә, беҙ был эште ҙур теләк менән башҡарып сығасаҡбыҙ.
Икенсе урында – Рәми Ғарипов исемендәге республика башҡорт гимназия-интернатының “VIP-йәштәр” КВН командаһы әҙерләгән көлкөлө күренеш. Төп ролдәге Нәзиф Сисәнбаев атлы егеттең тәпешкәһен бөтә Өфө буйлап эҙләүе ҡалабыҙға яҡшы реклама ла булғандыр. Афарин! Өсөнсө урында – Бөрйән районының “Ҡыпсаҡ-тв”һы төшөргән “Күңелле йәшәйбеҙ – 4” тигән яҙма. Улар конкурс барышында байтаҡ яҙыу ебәргән.
“Интернет һөйөүе” номинацияһында иң күп “йөрәк” йыйып еңеүселәр – “Шәп бейеүсе”, “Биҙәнеү серҙәре”, ”Әкиәтсе”.
Әйткәндәй, “Кәкре камера – 3”-кә әҙерләнә тороғоҙ, ул июндә башланасаҡ.
Айсын АҠБУЛАТОВА.