06.12.2013 “Кәңәшле йәшәһәң, тырышып эшләһәң, барыһы ла була”, ‒
– ти “Йәшлек”-фараз” конкурсында икенсе урын яулаусы Сирбаевтар 
Алыҫ араларҙы яҡынайтып, үткән аҙнала Баймаҡ тарафтарында булып ҡайттыҡ. Унда гәзитебеҙ иғлан иткән “Йәшлек”-фараз” конкурсында икенсе урын яулаусы Сирбаевтар ғаиләһенә бүләк тапшырҙыҡ.
Хужалар бик йылы ҡаршы алды ҡунаҡтарын. Нурия апай менән Миңнур инәй сәй әҙерләгән мәлдә, еңеүсенең тормош иптәше Шайморат Мөхөтдин улы менән әңгәмәләштек. Ул Баймаҡ ҡалаһында тыуып үҫкән, әле район элемтә үҙәгендә электромонтер булып эшләй.
– 1994 йылда район элемтә үҙәгенә эшкә урынлашҡайным, бына тиҙҙән 20 йыл була. Районда һәм ҡалала элемтә кабелдәре һуҙабыҙ, һуңғы йылдарҙа халыҡ араһында бик популяр IP-телевидение, интернет, телефон үткәрәбеҙ. Тышта, ямғыр-ҡар аҫтында йөрөгәс, эш ауыр, ләкин бирешмәйбеҙ. Заказдар ҙа күп, ҡайһы берҙә өлгөрөп тә булмай, – тине хужа.
Ә Нурия Шамил ҡыҙы Баймаҡ ҡала биләмәһе cоветы секретары булып эшләй. Был яуаплы вазифаны ул 2007 йылдан башҡара.
Сирбаевтарҙың ғаиләһендә ике бала үҫә. Өлкәндәре – Нәркәс әле БДУ-ның Сибай институтында белем ала, ә кинйәләре, Илдус 4-се мәктәп-лицейҙа 6-сы класта уҡый.
Бер аҙҙан әңгәмәгә Нурия апай ҙа ҡушылды һәм беҙҙең гәзиттең призын – электр һөт айырғысын тап үҙ мәлендә отоуҙары тураһында белдерҙе. Баҡтиһәң, хужалар йәйгеһен үҙҙәренең иҫке сепаратын яңыртырға уйлаған икән. Эйе, ҡала ерендә йәшәп тә, мал тотҡан Сирбаевтарҙың ғаиләһенә “Йәшлек”тең бүләге бик урынлы һәм файҙалы булып сыҡты.
Гәзиттең тиражы һанын нисек һайланығыҙ, тигән һорауға Нурия апай, быға ҡыҙыбыҙҙың ныҡымыш булыуы ярҙам итте, тине.
– Әсәй, әйҙә, беҙ ҙә “Йәшлек”-фараз”ға үҙебеҙҙең яуапты ебәрәйек, тигәс, башта гәзиттең алдағы тиражын ҡараныҡ, – ти хужабикә. – Шунан почта бүлексәләренә, киоскыларға, Өфөнөң төрлө ойошма-учреждениеларына күпме һан таратылыуын һанап сығарҙыҡ та, түңәрәкләп сығарған һөҙөмтәне купонға яҙҙыҡ.
Ҡала ерендә мал тотоу еңел эш түгел. Шулай ҙа хужалар бирешмәй, быҙаулы һыйыр аҫрай. Маллы ерҙә техника булыу бик шәп. Шайморат ағайҙың да Т – 40 АМ тракторы – бесән-һалам әҙерләгәндә беренсе ярҙамсы.
– Элек тормош ауыр булды, тиһәләр ҙә, кешеләр малды күп аҫраған. Хәҙер иһә ҡалала ғына түгел, ауылда ла бөтөрә. Баймаҡта бесән эшләүе ҡыйын түгел, йылҡы көтөүселәрҙән алда өлгөрһәң, ҡала ситендәге урмандарҙа сабынлыҡтар бар, ҡыш сығырға етерлек бесән туплап була. Һаламды баҫыуҙан ташырға мөмкин. Әле быйыл үлән булды, туғандарға, таныштарға ла бесән сабыштым, ташырға ла ярҙам иттем. Ялҡауланмай мал тотһаң, өҫтәлең һөт-майҙан, иттән өҙөлмәҫ. Бер эш хаҡына ғына йәшәүе ҡыйын, шуға ла йүнләп, икенсе ерҙә аҡса сығанағы эҙләмәйенсә булмай.
Трактор булғас, бесән эшләү еңелләште. КЗН сапҡысы менән үләнде сабам, аҙаҡтан тырматам. Тырманы ҡапҡа аша үтерлек һәм юлда башҡа транспортҡа ҡамасауламаҫлыҡ итеп өс метр киңлегендә яһаным, – ти хужа. Һыйыр янына кәзә лә алырға уйлауҙарын йәшермәне Шайморат ағай. Хужалар уның һөтөн һауып, шифалы ҡымыҙ бешергә ниәтләй.
Тирә-яҡҡа ысын биҙәк булып ултырған йорттарына Сирбаевтар ике йыл ярым элек күскән. Унда бөтә уңайлыҡ та бар, ләкин урамға һаман да тәбиғи газ үткәрелмәүе генә ҡыйынлыҡ тыуҙыра.
Шайморат ағай, өй һалған мәлдә төп таянысым һәм ярҙамсым Нурия апайығыҙ булды, тип ғорурлыҡ менән әйткәндән һуң уларҙың ғаилә бәхетенең нигеҙе нимәлә икәне асыҡланды. Был тормошта урындарын табып, һоҡланғыс ғаилә ҡорған Нурия һәм Шайморат Сирбаевтар быны үҙ-ара килешеүҙә һәм бер-береңде ихтирам итеүҙә тип һанай.
Айбулат ИШНАЗАРОВ.
Юлай КӘРИМОВ фотоһы.