24.10.2014 “Иҙел” таланттар эҙләй
Өфөнөң Ҡала мәҙәниәт һарайында 31 октябрҙә һәм 1 ноябрҙә “Иҙел” халыҡ-ара башҡорт һәм татар йыры конкурсы үтәсәк. Башҡортостан һәм Татарстандың Мәҙәниәт министрлыҡтары ярҙамы менән сара дүртенсе тапҡыр үткәрелә.
Профессиональ сәнғәтте үҫтереү һәм ике туғандаш республика араһындағы мәҙәни дуҫлыҡты нығытыу маҡсатында ойошторолған сараға йәш таланттар саҡырыла. Билдәле сәнғәт әһелдәре йәш башҡарыусылар менән тәжрибә уртаҡлашып, оҫталыҡ дәрестәре бирәсәк. Конкурста әлеге ваҡытта Ҡытай, Латвия, Үзбәкстандан, Мәскәү, Силәбе, Омск ҡалаларынан, Башҡортостан, Татарстан Республикаларынан йөҙҙән ашыу кеше ҡатнашырға теләк белдергән. Бындай ҙур масштабта үтәсәк сара ижад юлын башлап ҡына торған йәш таланттарға артабан үҫеү һәм билдәлелек яулау өсөн ҙур этәргес буласаҡ. Үҙенсәлекле һәм ҡабатланмаҫ тауыштар араһынан “иң-иң”дәрҙе һайлау өсөн жюри составына Рәсәйҙең һәм Башҡортостандың халыҡ артисы Флүрә Килдейәрова, профессор, Башҡортостандың атҡаҙанған сәнғәт эшмәкәре Фәрҙәнә Сәғитова, Башҡортостандың халыҡ артисы Вәхит Хызыров, Татарстандың һәм Рәсәйҙең халыҡ артистары Ренат Ибраһимов, Венера Ғәниева, Башҡортостандың атҡаҙанған мәҙәниәт хеҙмәткәре, билдәле композитор Нур Дауытов, Татарстандың халыҡ артисы Зөфәр Хәйретдинов һәм билдәле йырсы Хәлиҙә Бигичева саҡырылған.
Гала-концертта конкурстың финалсылары һәм билдәле сәнғәт әһелдәре ҡатнашасаҡ. Еңеүселәрҙе аҡсалата премиялар һәм ҡиммәтле бүләктәр көтә.
Г. ЮЛДАШЕВА.