16.01.2015 Командировка таныҡлыҡтары бөтөрөлә
Дәүләт һәм эшҡыуарлыҡ ойошмалары хеҙмәткәрҙәренә Рәсәй ҡалаларына сәфәргә барғанда командировка таныҡлыҡтарын алып йөрөргә кәрәкмәйәсәк.
Хәҙер эш биреүсегә сәфәрҙең датаһы һәм ваҡыты күрһәтелгән поезд йәки самолет билеты ла етә.
Командировка таныҡлыҡтары уларҙың йөкмәткеһе хеҙмәткәрҙәрҙе эш буйынса командировкаға йүнәлтеү тураһында бойороҡтоң йөкмәткеһен ҡабатлауы һәм уны тултырыу өҫтәмә хеҙмәт талап итеүе сәбәпле бөтөрөлә. Хеҙмәткәрҙе икенсе ҡалаға ебәреү өсөн бойороҡ ҡына кәрәк буласаҡ.
Әгәр хеҙмәткәр сәфәргә шәхси транспортында барырға теләһә, бында барыһы ла бик ябай. Хеҙмәткәр командировкала булыу ваҡытын рәсми яҙыуҙа күрһәтергә тейеш. Шуның менән бергә сәфәрҙә шәхси транспортын файҙаланыуын дәлилләүсе документтарҙы ла тапшырыуы зарур.
Рәсәйҙән ситкә сыҡҡанда хеҙмәткәрҙәргә командировка таныҡлыҡтары кәрәкмәй ине, сөнки сикте үтеү тураһындағы билдә сит ил паспортына ҡуйыла. Бойондороҡһоҙ дәүләттәр берләшмәһе илдәренә эшлекле сәфәргә барғанда ла борсолорға урын юҡ: сикте уҙғанда мисәт ҡуйылмаһа, хеҙмәткәрҙең эш буйынса барыуын билеттар менән дә раҫлап була.
Хөкүмәт ҡарары буйынса командировка таныҡлыҡтарын бөтөрөү бухгалтерҙарға документтар тултырыуҙы ла кәметә.
З. ХӘСӘНОВА.